சிவனின் வடிவமே லிங்கம். இந்தியாவில் சிவனுக்கு உருவ வழிபாடு அதிகம் கிடையாது.

லிங்க வடிவமே. இந்த லிங்கங்களில் சில அதிசய தோற்றங்களும் வடுக்களும் மாறுபட்டும் அந்தந்த ஊர்களின் வரலாற்றுக்கேற்ப உள்ளன.  அந்த வகையில் உள்ள சில அதிசய லிங்கங்களை பார்ப்போம்:

திருக்குறுக்கை: அட்ட வீரட்டதலங்களில் ஒன்று திருக்குறுக்கை. சிவன் காமனை எரித்த தலம் இது. சிவன் மீது காமன் தாமரைப்பூப் பாணம் விட்டான். எனவே சிவலிங்கத்தின் மீது தாமரைப்பூ தழும்பு உள்ளது.

கருவூர் பசுபதீஸ்வரர்: இது சுயம்பு லிங்கம். இங்கு இறைவனின் திருமேனி வடக்கு பக்கம் சற்று சாய்ந்து காட்சி தருகிறது. இறைவன் சாய்ந்து கருவூர்தேவருக்கு இடம் கொடுத்தார் என புராணம் கூறுகிறது.

திருப்புவனம்: மதுரை -  இராமநாதபுரம் சாலையில் உள்ள ஊர் இது.  இங்குள்ள பூவனநாதர் லிங்கத்தில் திரிசூலமும், சடைமுடியும் உள்ளன.

தேவிகாபுரம்: திருவண்ணாமலை மாவட்டத்திலுள்ள போளூருக்கு அருகே உள்ள ஊர். இங்கு ஒரே சந்நிதியில் பொன்மலைநாதரோடு காசிவிஸ்வநாதரும் சேர்ந்து காட்சியளிக்கிறார்.

திருப்பரங்குன்றம்: இது முருகனுக்கு முதல்படைவீடு. இங்கு முருகனுக்கு அருகே துர்க்கை, விநாயகர், சிவன், திருமால் சந்நிதிகள் உள்ளன. சிவனுக்கு நேர் எதிரே பவளக்கனிவாய்ப் பெருமாள் சன்னிதி உள்ளது. சிவலிங்கத்தின் நேர் எதிரே சன்னிதி உள்ளது இங்கு தான்.

திருவெறும்பூர்: திருச்சிக்கு அருகிலுள்ள ஊர்.  இங்கு மலை மீது கோவில் இருக்கிறது. லிங்கத்தை எறும்பு மொய்த்ததாகக் கதை. எறும்பு மொய்த்தது போன்று லிங்கம் காட்சி தருகிறது.

திருவானைக்காவல்:  இது திருச்சிக்கு அருகில் உள்ள ஊர். இங்குள்ள லிங்கத்தின் அடியில் தண்ணீர் ஓடிக்கொண்டே இருக்கும். இதனால் நீர் லிங்கம் என்று பெயர்.