சஷ்டியப்தபூர்த்தி செய்து கொள்ள திருக்கடையூர் செல்ல முடியாதவர்களுக்கு சென்னையிலுள்ள இந்த திருக்கடையூர் கோயில் ஒரு வரப்பிரசாதம்.

சென்னை அண்ணாநகர் 15 வது அவென்யூ அரங்கநாதன் தோட்டத்தில் பல நூற்றாண்டுகளுக்கு முன் "பாலீஸ்வரர்' என்ற பெயரில் ஒரு கோவில் இருந்தது.


காலப்போக்கில் அவ்வாலயம் சிதைந்து கவனிப்பாரற்றுப் போய்விட்டது. அப்பகுதியை தமிழ்நாடு வீட்டு வசதி வாரியம் கையகப்படுத்தி வீட்டுமனைகளாகப் பிரித்து ஒதுக்கீடு செய்தது. அப்போது அப்பகுதியை ஒட்டி காலியாக இருந்த மனையில் மண்ணுக்குள் புதைந்த நிலையில் ஒரு பெரிய சிவலிங்கம் இருந்தது கண்டறியப்பட்டது.

அது சூரிய பிம்ப வகையிலான அபூர்வ சிவலிங்கமாகும். சிவலிங்கத்தைக் கண்ட அப்பகுதி மக்கள் அதை வெளியில் எடுத்து மேற்கூரை அமைத்து வழிபட்டு வந்தனர். 1970-ஆம் ஆண்டு காஞ்சி மகாபெரியவரை நேரில் சந்தித்த மக்கள் இச்சிவலிங்கம் பற்றிய விவரங்களைத் தெரிவித்தனர். அப்போது அவர், அந்தச் சிவலிங்கம் முன்பு அந்தப் பகுதியில் இருந்த பாலீஸ்வரர் கோவிலுக்குரிய சிவலிங்கம் என்பதைத் தெரிவித்தார்.

சிவபெருமானின் திருக்கோலங்களை 25 திருமூர்த்தங்களாகப் பெரியோர் கூறுவர். அவற்றில் சந்திரமௌலீஸ்வரர் எனும் திரு மூர்த்தமும் ஒன்றாகும். காஞ்சி மகாபெரியவர் அண்ணாநகரில் பக்தர்கள் வழிபட்ட சிவலிங்கத்திற்கு சந்திரமௌலீஸ்வரர் எனப் பெயரிட்டார். திரிபுரசுந்தரி என்ற பெயரால் அம்பாளுக்குச் சந்நிதி அமைக்கவும், பரிவார தெய்வங்களுக்கு சந்நிதிகள் அமைத்து வழிபடவும் அறிவுரை தந்து ஆசி வழங்கினார்.

அவர் வழிகாட்டியபடி நவகிரகங்கள், துவார முருகர், விநாயகர், ஐயப்பன் மற்றும் சண்டிகேஸ்வரர் சந்நிதிகள் அமைக்கப்பட்டன. அங்கு வசிக்கும் மக்கள் ஒன்று சேர்ந்து 1978-ல் சந்திரமௌலீஸ்வரருக்கு கும்பாபிஷேகத்தையும் நடத்தினர். பின் பக்தர் கள் எண்ணிக்கை நாளுக்கு நாள் அதிகரித்ததால் விநாயகர், வள்ளி, தெய்வானை, ஆஞ்சனேயர், கால பைரவர், சிவகாமி உடனுறை உற்சவர் (நடராஜர்), கொடி மரம் முதலானவை சிறப் பான முறையில் அமைக்கப்பட்டன.

1996-ஆம் ஆண்டு மீண்டும் கும்பாபிஷேகம் நடந்தது. 42 அடி உயரத்தில் புதிதாக ஐந்து நிலைகள் கொண்ட ராஜகோபுரம் கட்டி முடிக்கப்பட்டு, 28-1-2007-ல் கும்பாபிஷேகம் நடந்தது. இக்கோவிலின் நுழைவாயில் தெற்குப்புறம் அமைந்துள்ளது இதன் சிறப்புகளில் ஒன்றாகும். திருச்செந்தூர், சுவாமி மலை, வடபழனி போன்ற முருகன் கோவில்கள் தெற்குப்புறம் நுழைவாயில் அமைந்துள்ள கோவில்களாகும். அவை விசேஷமான பரிகாரத் தலங்களாக விளங்குகின்றன. சந்திரமௌலீஸ்வரர் கோவிலும் தெற்குப் பார்த்த சந்நிதி உடையதாக இருப்பதால் இதையும் பக்தர்கள் பரிகாரத் தலமாக வழிபட்டு வருகின்றனர்.

உடல்நலம் பாதிக்கப் பட்டு மரண பயத்தில் உள்ளவர்களின் அச்சம் போக்க நடத்தப்படும் ஜபம் மிருத்யுஞ்சய ஜபம் எனப்படும். இத்தலத்திற்கு வந்து எம பயம் போக்கும் ம்ருத்யுஞ்சய ஜபம் செய்தால் நோய் நீங்கி ஆயுள் பலம் பெற்றுப் புத்துணர்ச்சியுடன் செல்லலாம் என்பது பக்தர்களின் நம்பிக்கை. அவர்கள் வேண்டுகோளின் பேரில் கடந்த பத்து ஆண்டுகளாக சந்திர மௌலீஸ்வரர் கோவிலில் மிருத்யுஞ்சய ஜபம் நடத்தப்பட்டு வருகிறது.

சந்திரமௌலீஸ்வரரை வணங்கும் பெண்களுக்கு புத்திர பாக்கியம் கிட்டும் என்ற நம்பிக்கையும்; தீராத நோய்களையும் நொடிப்பொழுதில் போக்கிவிடுவார் என்ற நம்பிக்கையும் பக்தர்களிடையே உள்ளது. மாதம்தோறும் பௌர்ணமி நாட்களில் பக்தர்களுக்கு அன்னதானமும் வழங்கப் படுகிறது. கலசங்களைப் பிரதிஷ்டை செய்து ருத்ர மந்திரத்தை ஜபம் செய்து செய்யும் யாகம் ருத்ர ஹோமம் எனப்படும்.

ஸ்ரீ ருத்ர மந்திரத்தால் யாகங்களைச் செய்து கலசத்தில் உள்ள நீரை உருவேற்றி அந்த நீரால் சிவனை அபிஷேகம் செய்வது ருத்ராபிஷேகம் ஆகும். பரிகாரத் தலமான இக்கோவிலில் பக்தர்கள் விரும்பும் நாட்களில் அவர்கள் வேண்டிய வண்ணம் ருத்ராபிஷேகம் நடைபெறுகிறது. ஒரு மாதத்தில் குறைந்தது மூன்று அல்லது நான்கு முறையாவது சந்திர மௌலீஸ்வரருக்கு ருத்ரா பிஷேகம் நடைபெறுவது கோவிலின் சிறப்புகளில் ஒன்றாகும்.

திருக்கடையூர் கால சம்ஹார மூர்த்தியை சென்று வணங்க முடியாதவர்கள் இத்தலத்தையே பரிகார ஸ்தலமாக வந்து வணங்கிச் செல்கின்றனர். சஷ்டியப்தபூர்த்தி, உக்ரரத சாந்தி, பீமரத சாந்தி, சதாபிஷேகம், ஆயுஷ்ய ஹோமம் செய்வதற்கு பரிகாரத் தலமாக உள்ளது. அறுபது வயது பூர்த்தியாகி சஷ்டியப்தபூர்த்தி செய்து கொள்ள சென்னை மட்டுமின்றி வெளிமாநிலம் மற்றும் வெளிநாடுகளில் இருந்தும் பக்தர்கள் இக்கோயிலுக்கு வருகிறார்கள்.