ஜக்கி வாசுதேவ் இயக்கத்துக்கு எடியூரப்பா ஆதரவு! தமிழகத்துக்கு தண்ணீர் கிடைக்குமா?

காவேரி கூக்குரல் இயக்கத்துக்கு கர்நாடக அரசு முழு ஆதரவு அளிக்கும் - முதல்வர் எடியூரப்பா அறிவிப்பு.


காவேரி நதிக்கு புத்துயிரூட்டுவதற்காக சத்குரு தொடங்கியுள்ள காவேரி கூக்குரல் இயக்கத்துக்கு கர்நாடக மாநில அரசு முழு ஆதரவு அளிக்கும் என்று கர்நாடக முதல்வர் திரு.எடியூரப்பா தெரித்துள்ளார். காவேரி கூக்குரல் இயக்கத்தில் தமிழ்நாடு மற்றும் கர்நாடக மாநில அரசுகள், விவசாயிகளின் பங்களிப்பை அதிகரிப்பதற்காக ஈஷா அறக்கட்டளை நிறுவனர் சத்குரு தலகாவேரியில் இருந்து திருவாரூர் வரை மோட்டார் சைக்கிள் பயணம் மேற்கொண்டுள்ளார்.

இதன் ஒரு பகுதியாக, பெங்களூரூவில் ஆயிரக்கணக்கான பொதுமக்கள் பங்கேற்ற மாபெரும் பொதுக் கூட்டம் திருபுரவாசினி அரண்மனை மைதானத்தில் நேற்று (செப்.8) மிகப் பிரமாண்டமாக நடைபெற்றது.

இதில் மாண்புமிகு கர்நாடக முதல்வர் திரு.பி.எஸ்.எடியூரப்பா, சுற்றுலா துறை அமைச்சர் திரு.சி.டி.ரவி, மக்களவை உறுப்பினர் திரு.பி.சி.மோகன், பயோகான் நிறுவனத்தின் மேலாண் இயக்குநர் திருமதி.கிரண் மசூம்தார் ஷா, மைசூரூ அரண்மனையின் ராஜமாதா திருமதி.பிரமோதா தேவி ஆகியோர் சிறப்பு விருந்தினர்களாக பங்கேற்றனர். 

இவ்விழாவில் முதல்வர் எடியூரப்பா பேசியதாவது:

காவேரி கூக்குரல் என்ற இந்த இயக்கம் கர்நாடக மாநிலத்தில் உள்ள ஆறரை கோடி மக்களை விழிப்படைய செய்துள்ளது. இவ்வியக்கத்துக்கு கர்நாடக மாநில அரசு எங்களால் முயன்ற அனைத்து வழிகளிலும் முழு ஆதரவளிக்கும். முடிந்தளவு அதிக மரக் கன்றுகளை உற்பத்தி செய்து வழங்குமாறு கர்நாடக வனத் துறைக்கு நான் ஏற்கனவே அறிவுறுத்தி உள்ளேன். 

காவேரி நதிக்கு புத்துயிரூட்டும் உன்னத நோக்கத்திற்காக கர்நாடகாவும் தமிழ்நாடும் ஒன்றிணைந்து செயல்பட வேண்டும் என்று விரும்புகிறேன். நம் பிரதமர் நரேந்திர மோடியும் காவேரி கூக்குரல் இயக்கத்துக்கு தனது வாழ்த்துக்களை தெரிவித்துள்ளார்.

உங்கள் (சத்குரு) தலைமையின் கீழ் காவேரி வடிநிலப் பகுதியில் 242 கோடி மரங்கள் நடுவதற்காக தங்களின் அனைத்து எதிர்பார்ப்புகளையும் நாங்கள் பூர்த்தி செய்வோம். இதை நாங்கள் மாநில அரசின் கடமையாகவே கருதுகிறோம்.

இவ்வாறு முதல்வர் எடியூரப்பா பேசினார்.

விழாவில் சத்குரு பேசியதாவது:

காவேரி நதி கர்நாடகாவின் விலைமதிப்பற்ற பொக்கிஷங்களில் ஒன்று. காவேரி கூக்குரல் இயக்கத்துக்கு ஆதரவளித்து இங்கு கூடியிருக்கும் நீங்கள், நாம் தெரிந்தோ, தெரியாமலோ காவேரி நதிக்கு ஏற்படுத்தி இருக்கும் பாதிப்பை சரிசெய்ய தயாராக இருக்கிறோம் என்பதை வெளிகாட்டுகிறீர்கள். 

நீரை சேமிப்பதற்கு மண் தான் உண்மையான நீர்த்தேக்கம். 242 கோடி மரங்களை நடுவதன் மூலம் நாம் டிரில்லியன்கணக்கான லிட்டர் நீரை சேமிக்க முடியும். இது நடந்தால் நம் நதிகள், ஏரி, குளங்கள், கிணறுகளில் நீர் பெருக்கெடுக்கும்.

காவேரி நதிக்கு புத்துயிரூட்டுவதன் மூலம் இறந்து வரும் ஒரு நதியை நம்மால் மீட்க முடியும் என்பதை கர்நாடக மக்கள் இந்த உலகுக்கு கட்டாயம் உணர்த்த வேண்டும்.

காவேரி கூக்குரல் இயக்கத்துக்கு முழு ஆதரவு அளித்துள்ள கர்நாடக முதல்வருக்கு எனது நன்றியை தெரிவித்துக்கொள்கிறேன். காவேரி கூக்குரல் பேரணி பல்வேறு நகரங்களில் சிறப்பாகவும் பாதுகாப்பாகவும் நடைபெறுவதற்கு உறுதுணையாக இருந்த கர்நாடக காவல் துறைக்கு எனது நன்றியை தெரிவித்துக்கொள்கிறேன். உங்களின் பங்களிப்பு பாராட்டுக்குரியது.

இவ்வாறு சத்குரு பேசினார்.

மேலும், காவேரி கூக்குரல் இயக்கத்தை பல்வேறு வழிகளில் மக்களிடம் கொண்டு சேர்த்த அனைத்து கர்நாடக ஊடகங்களுக்கும் சத்குரு நன்றி தெரிவித்தார்.

இவ்விழாவில் மணிபால் கல்வி நிறுவனங்களின் தலைவர் திரு.மோகன் தாஸ் பை, பிரிட்டானியா நிறுவனத்தின் மேலாண் இயக்குநர் திருமதி.வினிதா பலி, டாடா ஸ்டீல் நிறுவனத்தின் முன்னாள் துணை தலைவர் திரு.பி.முத்துராமன், டி.ஜி.பி திருமதி.நீலிமா ராஜூ, முன்னாள் தடகள வீராங்கணை அஸ்வினி நச்சப்பா ஆகியோர் சிறப்பு அழைப்பாளர்களாக பங்கேற்றனர்.

முன்னதாக, நேற்று காலை கண்டீரவா மைதானத்தில் இருந்து அரண்மனை மைதானம் வரை மோட்டார் சைக்கிள் பேரணி நடைபெற்றது. இதில் சத்குருவுடன் நூற்றுக்கணக்கானோர்  மோட்டார் சைக்கிள்களில் பேரணியாக சென்றனர். அப்போது பெங்களூரூவாசிகள் வழிநெடுகிலும் நின்று பேரணிக்கு உற்சாக வரவேற்பு அளித்தனர்.

காவேரி கூக்குரல் இயக்கத்துக்கு கர்நாடகாவில் வரலாறு காணாத ஆதரவு கிடைத்துள்ளது. அரசியல் தலைவர்கள், விளையாட்டு வீரர்கள், திரை பிரபலங்கள், விவசாயிகள், தொழில் துறையினர், ஊடகத் துறையினர் மற்றும் பொதுமக்கள் என பல தரப்பட்டோர் இவ்வியக்கத்துக்கு தங்களின் பேராதாரவை அளித்துள்ளனர்.

காவேரி கூக்குரல் பேரணி செப்.11-ம் தேதி ஓசூர் வழியாக தமிழகம் வர உள்ளது. பின்னர், தர்மபுரி, மேட்டூர், ஈரோடு, திருச்சி, தஞ்சாவூர், திருவாரூர், புதுச்சேரி வழியாக சென்னை வந்தடையும். பேரணியின் நிறைவு நிகழ்ச்சி செப்.17-ம் தேதி கோவையில் நடைபெற உள்ளது.

ஊடக தொடர்புக்கு: 90435 97080, 63831 25184.