ஆந்திராவின் தெலுங்கு பெண் சூப்பர் ஸ்டாரும் காங்கிரஸ் கட்சியை சேர்ந்தவருமான நடிகை விஜயசாந்தி மீண்டும் பாஜகவில் ஐக்கியமாக உள்ளதாக தகவல் வெளியாகி உள்ளது.

தசரா பண்டிகைக்கு முன்பாக விஜயசாந்தி பாஜகவில் இணைய வாய்ப்பு உள்ளதாக அக் கட்சியின் வட்டாரங்கள் தெரிவிக்கின்றனர். மேலும் தற்போது மகாராஷ்டிராவில் சட்டமன்றத் தேர்தல் வருவதால் நட்சத்திர பேச்சாளராக விஜயசாந்தி களம் இறங்குவார் எனவும் கூறப்படுகிறது.

பாஜகவில் இணைய வேண்டும் என பாஜக தேசிய செயலாளர் முரளிதர ராவ் மற்றும் ஆர்.எஸ்.எஸ் தலைவர்கள் விஜயசாந்தியுடன் கடந்த 15 நாட்களாக பேச்சுவார்த்தை நடத்தி வந்துள்ளனர்.

பிரம்மாண்ட பொதுக்கூட்டம் நடத்தி விஜயசாந்தியை பாஜகவில் இணையச் செய்ய தெலங்கானா பாஜக தலைவர்கள் திட்டமிட்டிருப்பதாகவும் அல்லது டெல்லியில் பாஜகவின் முக்கிய தலைவர்களை சந்தித்து விஜயசாந்தி கட்சியில் இணைவார் என்றும் கூறப்படுகிறது. பாஜகவில் விஜயசாந்தி இணையப் போவது குறித்து உறுதியான தகவல்கள் என்றாலும், எப்போது கட்சியில் இணைவார் என்ற தகவல்கள் எதுவும் கிடைக்கப் பெறவில்லை.

தெலுங்கு, தமிழ், மலையாளம், கன்னடம், இந்தி மொழி திரைப்படங்களில் நடித்து பிரபலமடைந்த நடிகை விஜயசாந்தி, 1998ம் ஆண்டு பாஜகவில் இணைந்து மகளிர் பிரிவு செயலாளர் பதவியில் செயல்பட்டு வந்தார். பின்னர் பாஜவிலிருந்து விலகி, தனிக்கட்சியை ஆரம்பித்தார். தொடர்ந்து அந்தக் கட்சியை தெலங்கானா ராஷ்டிரிய சமிதி கட்சியுடன் இணைத்த அவர், பின்னர் 2014ம் ஆண்டு காங்கிரஸ் கட்சியில் இணைந்தார்.