காவல் துறைக்கு எதிராக பொங்கியெழுந்த பால் விநியோகஸ்தர்கள்…! சபாஷ் சரியான நடவடிக்கை.

இந்த கொரோனா காலத்தில், ஒவ்வொரு நபரும் அவரால் முடிந்த வரையிலும் சமூகத்திற்கு நன்மை செய்யும் வகையில் ஏதேனும் ஒரு வகையில் உதவிக்கொண்டுதான் இருக்கிறார்கள். அதில் பால் விநியோகஸ்தர்களின் பங்களிப்பை மறக்க முடியாது.


ஆனால், அவர்களே இன்று பொங்கியெழும் நிலைமை ஏற்பட்டுவிட்டது. ஆம், தமிழகம் முழுவதும் காவல்துறையினர் வீடுகளுக்கு பால் விநியோகம் செய்யப் போவதில்லை என்று பால் முகவர்கள் சங்கம் அறிவிப்பு வெளியிட்டுள்ளது. 

அத்தியாவசிய உணவுப் பொருளாக விளங்கும் பால் விநியோகத்தில் தமிழகம் முழுவதும் சுமார் 1.5லட்சம் பால் முகவர்கள் ஈடுபட்டு வருகின்றனர். கொரோனா பேரிடர் காலமான தற்போது மக்களுக்கு பால் தங்குதடையின்றி, தட்டுப்பாடின்றி கிடைக்க வேண்டும் என்கிற நோக்கத்தில் தகுந்த பாதுகாப்போடு பால் விநியோகம் செய்யும் பணிகளில் ஈடுபட்டு வருகின்றனர். 

அத்தியாவசிய உணவுப் பொருளாக விளங்கும் பால் விநியோகத்திற்கும், விற்பனைக்கும் தமிழக அரசு தடை கிடையாது என அறிவித்துள்ள நிலையில் பால் விநியோகத்தில் ஈடுபட்டு பால் முகவர்களை பால் விநியோகம் செய்ய விடாமல் வாகனங்களை பறிமுதல் செய்வது, வாகனங்களை தடுத்து நிறுத்துவது, பால் விநியோக மையங்களை, பால் விற்பனை நிலையங்களை மூடச் சொல்லி மிரட்டுவது என பல இடையூறுகளை காவல்துறையினர் செய்து வருகின்றனர்.

இது தொடர்பாக தமிழக முதல்வர், பால்வளத்துறை அமைச்சர், காவல்துறை தலைவர், ஆணையாளர் ஆகியோரது கவனத்திற்கு கொண்டு சென்றும் இது வரை எந்த ஒரு தீர்வும் கிடைக்காமல் இருக்கிறது. எனவே நாளை முதல் காவல்துறையினர் வீடுகளுக்கு பால் விநியோகம் செய்வதில்லை என்று தமிழ்நாடு பால் முகவர்கள் தொழிலாளர்கள் நலச் சங்கம் சார்பில் அவசர முடிவு எடுக்கப்பட்டுள்ளது.

பால் விநியோகம் செய்யும் பால் முகவர்களுக்கு காவல்துறையினரால் ஏற்படும் பிரச்சினைகளுக்கு நிரந்தர தீர்வு கிடைக்கும் வரை கடைநிலை காவலர்கள் தொடங்கி உயரதிகாரிகள் வரை எவரது வீடுகளுக்கும் பால் விநியோகம் செய்யப் போவதில்லை என்று கூறியுள்ளனர். இந்த போராட்டம் தடுக்கபடலாம், பேச்சுவார்த்தை மூலம் தீர்க்கப்படலாம். ஆனால், இது சரியான முன்னெடுப்பு.

காவல் துறையில் இருக்கும் திருடர்களையும், அயோக்கியர்களையும் தடுத்து நிறுத்தவேண்டிய பொறுப்பு மற்றவர்களுக்கு உண்டு என்பதை உணரவேண்டிய தருணம் இது.