கார வகை போண்டா சாப்பிட்டிருப்போம். இனிப்பு போண்டா என்றால் கோதுமை மாவில்தான் செய்து பார்த்திருப்போம். ரவையில் எப்படி இனிப்பு போண்டா செய்யலாம் என்று பார்ப்போம்.

தேவையானவை:

ரவை - முக்கால் கப்,

பச்சரிசி மாவு - கால் கப்,

பொடித்த வெல்லம் - 1 கப்,

உப்பு - ஒரு சிட்டிகை,

எண்ணெய் - தேவையான அளவு.

செய்முறை:

ரவையை சிறிது தண்ணீர் தெளித்து பிசறி, நன்கு அழுத்திவிட்டு ஒரு மணி நேரம் ஊறவிடுங்கள். ஆட்டுக்கல்லில் போட்டு, நன்கு கெட்டியாக அரையுங்கள். பின்னர் அதனுடன் வெல்லத்தூள் சேர்த்து அரையுங்கள். நன்கு அரைபட்டதும் பச்சரிசி மாவைத் தூவி, இரண்டு நிமிடம் ஆட்டியெடுங்கள்.

எண்ணெயை நிதானமான தீயில் காயவைத்து, சிறு சிறு போண்டாக்களாக போட்டு, வெந்ததும் எடுத்துப் பரிமாறுங்கள். மாவு இளக்கமாக இருந்தால் சிறு கரண்டியால் எடுத்து ஊற்றி, வேக வைத்தெடுங்கள். (வெல்லத்துக்கு பதில் சர்க்கரையும் சேர்க்கலாம்).