ஆலங்குளம் எம்எல்ஏ பூங்கோதை ஆலடி அருணா தனது தொகுதிக்கு உட்பட்ட பகுதியில் கொரோனா தனிமை வார்டு அமைப்பதை எதிர்த்து அதிகாரிகளிடம் வாக்குவாதத்தில் ஈடுபட்ட சம்பவம் பெரும் பரபரப்பை ஏற்படுத்தியுள்ளது.

நெல்லை மாவட்டம், மேலப்பாளையத்தில் உள்ள உறவினர் ஒருவர் இறந்த செய்தியைக் கேட்டு தென்காசி மாவட்டம் கடையநல்லூர் பகுதியை சேர்ந்த இஸ்லாமியர் அவரது உறவினர்கள் 9 பேர் தனி வாகனம் மூலம் மேலப்பாளையம் சென்று விட்டு மீண்டும் சொந்த ஊருக்கு திரும்பி வந்து கொண்டிருந்தனர். இவர்கள் மாவட்ட நிர்வாகத்திடம் முறையாக அனுமதி பெறாத காரணத்தினால் காவல்துறையினர் கடையநல்லூர் ரயில்வே கேட் அருகே வைத்து ஊர் திரும்பிய இஸ்லாமியர்கள் 9 பேரையும் சுகாதாரத் துறையின் கட்டுப்பாட்டில் ஒப்படைத்தனர். 

இதனை அடுத்து சுகாதாரத்துறையினர் அந்த ஒன்பது பேரையும் ஆலங்குளம் அருகே உள்ள தனியார் கல்லூரிக்கு சொந்தமான விடுதியில் தங்க வைத்து தனிமை சிகிச்சை கொடுக்க முயற்சி செய்தனர். இதுகுறித்து தகவலறிந்த ஆலங்குளம் தொகுதி எம்எல்ஏ பூங்கோதை ஆலடி அருணா சம்பவ இடத்திற்கு விரைந்தார். அவருடன் கல்லூரிக்கு அருகே உள்ள அத்தியூத்து , ஆண்டிபட்டி போன்ற பகுதியில் இருந்து நூற்றுக்கணக்கான மக்கள் கல்லூரி அருகே திரண்டனர்.

பின்னர் இது தொடர்பாக அரசு அதிகாரிகள் மற்றும் காவல் துறையினரிடம் பேச்சுவார்த்தை நடத்திய எம்எல்ஏ  பூங்கோதை மேலப்பாளையத்தில் கொரோனாவால் பாதிக்கப்பட்டவர்கள் அதிகமாக இருக்கும் போது மாவட்ட ஆட்சியர் எவ்வாறு அந்த ஒன்பது பேரையும் அனுமதித்தார் எனவும் அனுமதி பெறாமல் சென்றிருந்தால் அந்த ஒன்பது பேரையும் கைது செய்யுங்கள் எனவும் காவல்துறையினரிடம் வாக்குவாதம் நடத்தினார்.

அதுமட்டுமல்லாமல் தனது தொகுதியான ஆலங்குளம் பகுதியில் இதுவரை கொரோனா தொற்று இல்லை. வேறு தொகுதிக்கு உட்பட்டவர்களை ஆலங்குளத்தில் உள்ள தனியார் கல்லூரி உட்பட்ட விடுதியில் தனிமைப்படுத்தினால் ஒருவேளை அவர்களுக்கு கொரோனா இருப்பது உறுதியானால் தனது தொகுதியான ஆலங்குளம் பகுதியில் உள்ள மக்களுக்கும் அது பரவும்.ஆகையால் அவர்களை கடையநல்லூருக்கு உட்பட்ட பகுதியிலேயே வைத்து தனிமைப்படுத்த வேண்டும்.

ஆகையால் ஆலங்குளத்தில் உள்ள தனியார் கல்லூரிக்கு சொந்தமான விடுதியில் அனுமதிக்க முடியாது என அவர் அதிகாரிகள் மற்றும் காவல் துறையினரிடம் பொது மக்களின் துணையோடு வாக்குவாதத்தில் ஈடுபட்டார். இதையடுத்து அரசு அதிகாரிகள் மாவட்ட ஆட்சியருடன் தொடர்பு கொண்டு 9 பேரையும் வேறு இடத்திற்கு கொண்டு சென்றனர் என்பது குறிப்பிடத்தக்கது. இந்த சம்பவம் அப்பகுதி மக்களிடையே பெரும் பரபரப்பை ஏற்படுத்தியது.